साकार पोष्ट गल्छी धादिङको गल्छी गाउँपालिका–७ मा आशा लघुवित्त वित्तीय संस्था लिमिटेडद्वारा आयोजित वित्तीय साक्षरता तथा केन्द्र प्रमुख गोष्ठी सम्पन्न भएको छ। कार्यक्रम जेष्ठ सदस्य ढन्ड कुमारी सिलवालको सभापतित्वमा सम्पन्न भएको थियो।
कार्यक्रमका प्रमुख अतिथि गल्छी गाउँपालिका वडा नं. ७ का वडा अध्यक्ष हरि खतिवडाले लघुवित्त संस्थाबाट लिएको ऋणको सही सदुपयोग नभएका कारण विभिन्न आर्थिक तथा सामाजिक समस्याहरू देखिन थालेको उल्लेख गर्नुभयो। उहाँले ऋणलाई उत्पादनशील क्षेत्रमा प्रयोग गर्न सबैलाई आग्रह गर्नुभयो।
त्यसैगरी, कार्यक्रममा अतिथिका रूपमा गल्छी प्रहरी चौकीका प्रतिनिधिको उपस्थिति रहेको थियो। कार्यक्रममा आशा लघुवित्तका गल्छी शाखा प्रमुख शिव थापा मगरले वित्तीय संस्थाको उद्देश्य, सेवा तथा ऋण उपयोगको सही तरिकाबारे जानकारी गराउनुभएको थियो।
गोष्ठीमा सहभागीहरूले वित्तीय साक्षरता अभिवृद्धि, बचत तथा ऋणको प्रभावकारी उपयोगबारे छलफल गरेका थिए। कार्यक्रमले स्थानीय स्तरमा आर्थिक सचेतना बढाउन सहयोग पुगेको सहभागीहरूले बताएका छन्।
