साकार पोष्ट २९ वैशाख, धादिङ । जिल्ला प्रहरी कार्यालय धादिङले आज छुरा हानेर हत्या गरेको आरोपमा आमा छोरा सहित तीन जना अभियुक्तलाई शुक्रवार सार्वजनिक गरेको छ ।होटलमा खाजा खान आएका गल्छी ८ का विनोद थापा मगरलाई हत्या गरेको आरोपमा गल्छी ८ निवुवावोटोमा शानदार होटल एण्ड लजकी सञ्चालिका सरस्वती पनेरु पण्डित, उनका छोरा निरज पण्डित र किरण रानालाई पक्राउ गरेको जिल्ला प्रहरी कार्यालय धादिङका प्रमुख एवम् प्रहरी उपरिक्षक गौतम मिश्रले बताए ।घट्नामा प्रयोग भएको छुरा आज प्रहरी घटनास्थल भन्दा ३० मिटर तल त्रिशुली नदीतर्फको किनारमा शुक्रबार बिहान प्रहरीले फेला पारेको हो । अभियुक्तले सनाखत गरिसकेपछि बरामद गरिएको उनले बताए ।४७ वर्षीय आमा सरस्वती पनेरु पण्डित, २६ वर्षिय छोरा निरज पण्डित र पाल्पा तानसेन नगरपालिका १४ घरभई हाल गल्छी ८ बस्दै आएका ३० वर्षिय किरण रानालाई कर्तव्य ज्यान मुद्धामा धादिङ अदालतबाट तीन दिनको म्याद थप अनुमति लिई अनुसन्धान भैरहेको एसपी मिश्रले बताए पनेरुले केटीहरुलाई डर, त्रास, प्रलोभनमा पारी वेश्यावृत्ति लगाई मानव बेचबिखन गरेको उजुरीको आधारमा मानव बेचबिखन तथा ओसारपसार मुद्दामा समेत म्याद थप गरिएको एसपी मिश्रले बताए ।
