साकार पोष्ट धादिङ मंसिर २९ गल्छी बैरेनी । गल्छी गाउँपालिका–६ स्थित बैरेनी अस्पतालको परिसरमा घरमा पालेका कुखुरा प्रवेश गर्न पूर्ण रूपमा रोक लगाइएको छ। अस्पताल परिसरमा कुखुरा छाड्दा फोहर फैलिने, बिरामी तथा सेवाग्राहीलाई असहज हुने र स्वास्थ्य जोखिम बढ्ने अवस्था देखिएपछि यस्तो निर्णय गरिएको अस्पताल प्रशासनले जनाएको छ।
बैरेनी अस्पताल सञ्चालन तथा व्यवस्थापन समितिको निर्णयअनुसार अबदेखि अस्पतालको प्राङ्गणभित्र घरपालुवा कुखुरा प्रवेश गराए वा छाडेमा सम्बन्धित व्यक्तिलाई ५ सय रुपैयाँ जरिवाना गरिनेछ। सूचनाअनुसार अस्पताल क्षेत्रलाई सफा, सुरक्षित र व्यवस्थित राख्न उक्त व्यवस्था लागू गरिएको हो।
अस्पतालका मेडिकल सुपरिटेन्डेन्ट डा. मधुकर दाहालका अनुसार अस्पताल संवेदनशील क्षेत्र भएकाले सरसफाइ र स्वास्थ्य सुरक्षामा कुनै पनि लापरवाही स्वीकार्य नहुने बताउनुभयो। उहाँले सबै स्थानीयवासी तथा सेवाग्राहीलाई सूचनाको पालना गर्न आग्रह गर्नुभयो।
अस्पताल प्रशासनले अस्पताल परिसरभित्र कुखुरा नियन्त्रणमा राख्न र यस्तो कार्य दोहोर्याएमा कारबाही हुने स्पष्ट पारेको छ।
